Este venres 22 de abril ao mediodía celebrouse a inauguración oficial da nova Comisaría da Policía Nacional de Ribeira, no barrio de Fontán (avenida das Airós). Asistiron representantes das Administracións central, autonómica e local, como por exemplo Fernando Grande-Marlaska, ministro do Interior, José Miñones, delegado do Goberno en Galicia, Fabiola García, conselleira de Política Social, María Rivas, subdelegada do Goberno na Coruña, Francisco Pardo, director xeral da Policía e Manuel Ruíz, alcalde de Ribeira.
O acto, no que tamén participou o director xeral de Emerxencias e Interior da Xunta, Santiago Villanueva, púidose seguir por streaming a través da canle da Policía Nacional en Yotube.
O ministro do Interior, Fernando Grande-Marlaska, na súa intervención, lembrou que a construción da nosa sede policial veu cun investimento de máis de 3,1 millóns de euros. “Investir en infraestruturas de seguridade é garantir o benestar de todos. Non é un gasto, é un investimento en dereitos e liberdades”, sinalou durante o acto de inauguración. “Un dos meus compromisos ao comezo da lexislatura foi fortalecer os medios nos que se prestan os servizos públicos do departamento e ocasións como esta demostran que os esforzos están a merecer a pena”, engadiu o ministro, que mencionou na súa intervención as obras de Policía Nacional e Garda Civil previstas para Galicia dentro do Plan de Infraestruturas da Seguridade do Estado.
Pola súa banda, a ribeirense Fabiola García salientou que con “este cambio de localización, as oficinas da nova sede da Policía Nacional en Ribeira serán máis amplas e luminosas e facilitarase o traballo dos profesionais adscritos ao cadro de persoal ribeirense”. Tamén destacou a importancia de contar cun corpo de seguridade do Estado que vixíe e controle a seguridade e benestar dos cidadáns.
