A Real e Ilustre Confraría da Dorna está inmersa nestes días, xunto coa comunidade de dorneiras e dorneiros, na organización dunha das máis importantes actividades anuais de cantas impulsa a entidade fóra da axenda de verán: a Sea Benéfica dorneira.
Trátase dun evento aberto e participativo que este ano, tendo en conta os reveses que están a sufrir os colectivos máis vulnerábeis, cobra máis importancia ca nunca. Iso si, malia a relevancia do acontecemento, a organización (como de costume) mostrará de novo a súa capacidade para compatibilizar transcendencia con carallada, tal e como demostran as normas de vestimenta a seguir, que veñen co seguinte código: “Hai que levar aljo na cabesa coma un jorro, unha diadema ou no seu defecto unha vasenilla. Daráselle premio ao máis pomposo e juai, así que saca as mellores jalas”.
A cita será este sábado 2 de abril ás 21.28 horas, no Restaurante Baiuca. O menú inclúe aperitivos (tosta de queixo con rexóns, samburiñas ao jratén e cocretas caseiras variadas) e empratados (risotto de langonistnos e trijeros, albardafito de solombo en salsa de viño rosada e patadas panadeira e croulant de chocolate con xeado de mandarina). Todo regado con viños branco e tinto, augas minerais e refrescos e cafés e infusións. No transcurso do ágape farase un sorteo coas doazóns dos comercios locais e “aparte, outras apañadas no punto limpo”. Todo o recadado irá destinado ao fondo social.
Os prezos son de 35 euros para sosios e 38 para jodechincos.
