O BNG de Ribeira vén de facerse eco das queixas veciñais en relación ao estado no que se atopa a estrada de Fontán, a que une a beiramar, entre Bandourrío e O Touro, co lugar de Martín. Segundo fai saber a agrupación, os residentes esixen o arranxo integral da dita vía. Estas peticións van ser levadas a pleno.
A orixe do problema está na sobrecarga de tráfico rodado que recibe a estrada esta tempada ao estar cortada a rúa Romero Ortiz por obras, sendo a principal vía de acceso dos residentes que viven nestes barrios e máis no do Monumento. “Esta vía, duns 100 metros de longo, está sendo usada polas persoas que acceden á nova Comisaría de Policía Nacional pero tamén é usada pola veciñanza do Monumento e de Martín para acceder ao centro de Ribeira”, lembra o BNG, a través do seu portavoz Luís Pérez Barral, quen recoñece que recibiu a chamada de veciños para que se tomasen medidas “ante o mal estado de conservación do pavimento no que se poden ver fochancas e ausencia de sumidoiros ou de sinalización vertical e horizontal”.
Pérez Barral critica o que considera “unha mala planificación do Goberno local á hora de realizar as obras que afectan ao tráfico supoñan importantes molestias para a veciñanza por non habilitar alternativas para a boa circulación do tráfico”.
Así pois, tras escoitar as demandas trasladadas pola veciñanza, o BNG rexistrou unha iniciativa na que lle pide ao Concello “unha actuación dilixente para arranxar de maneira integral a estrada que une O Touro con Martín para que sexa máis segura tanto para peóns como para vehículos”.