O venres 25 de marzo a Sala Arcos Moldes do Auditorio de Rianxo dará acollida ao Teatro de Noroeste para representar a obra Gloria Nacional, patrocinada pola Deputación da Coruña co gallo da celebración do Día do Teatro 2022. Gloria Nacional é un espectáculo escrito por Eduardo Alonso que nos propón, en palabras da compañía, “unha fermosa reflexión sobre o lugar que ocupa o creativo e a cultura na sociedade actual”.
O reparto está formado por Luma Gómez, Miguel Pernas e Manuela Varela.
A entrada é de balde, pode facerse a reserva a través da web municipal.
Argumento
Uxío Rodas, escultor e pintor, é considerado polos seus contemporáneos unha auténtica “gloria nacional”. As súas esculturas están nos mellores museos internacionais. Agora está no seu estudo, apartado da civilización, tentando concentrarse no seu traballo máis importante. Efectivamente, o goberno do seu país, a través do seu presidente, antigo camarada de Uxío, acaba de encargarlle unha escultura monumental que se colocará na praza principal da capital: unha escultura que represente e simbolice á nación. A Uxío cústalle encarar o seu traballo, está en crise creativa, e estando nestas recibe a visita, primeiro do seu representante e marchante nos mercados internacionais e despois a da propia ministra de cultura do seu país. O actual debate, arte, cultura, mercados e política está servido.
