Amicos formou a 15 persoas en operacións básicas de recepcionista

Amicos entregou este venres 12 os diplomas acreditativos do curso de Operacións básicas de recepcionista – bedel ás 15 persoas que participaron no mesmo. A formación forma parte do Programa Más Empleo, financiado por Fundación La Caixa e o FSE, e impulsado por Amicos.

No acto estivo presente Ana Barreiro, concelleira de Servizos Sociais de Ribeira, que se mostrou “encantada” de colaborar neste tipo de iniciativas que promoven a formación e a inserción das persoas con discapacidade. Grazas ao Concello de Ribeira o curso puido desenvolverse nas aulas de Cristóbal Colón.

Os alumnos, a través das 20 horas impartidas, adquiriron as competencias profesionais requiridas para desenvolver tarefas propias do posto de recepcionista ou bedel en entidades e empresas de forma eficaz e de acordo á situación e momentos concretos.

O curso tivo unha duración de 20 horas repartidas entre o luns, 7 de marzo de 2022, e o venres, 11 de marzo de 2022 en horario de 10:00 a 14:00 horas e foi impartido por Recursos Galicia.

Keltoi Cameán, técnico do Programa Más Empleo, sinalou que “Amicos leva desenvolvendo este programa dende 2017 e o ano pasado logramos alcanzar o máximo de persoas con discapacidade inseridas na comarca”. Engadiu: “En este 2022 xa levamos máis de 40 participantes no programa e agardamos que algunhas destas persoas sexan inseridas en Ribeira”.

A seguinte formación titulada Expendedor/a de combustible comezará o luns, 4 de abril de 2022, na Aula Activa do Mar de Rianxo e tamén está dirixida ás persoas con diversidades funcionais e cognitivas. Será gratuíta e en horario de 10:00 horas a 14:00 horas.