O Concello de Ribeira vén de solicitar a súa adhesión á Rede de Destinos Turísticos Intelixentes: unha entidade instituída no 2018 polo Ministerio de Industria, Comercio e Turismo que ten como obxectivo “liderar o desenvolvemento do sector turístico a través da innovación e a tecnoloxía e desde a sustentabilidade”. Está integrada por máis de 250 membros (entre concellos, asociacións, fundacións, deputacións, mancomunidades, comarcas, empresas públicas, organismos nacionais e colaboradores).
Coa súa adhesión, Ribeira persegue beneficiarse da promoción de sinerxías e da transferencia de coñecementos que se produce no seu seo, contribuíndo con isto “a mellorar as potencialidades do noso municipio como destino turístico, o cal foi seleccionado para a posta en marcha dun Plan de Turismo Sustentábel entre os anos 2022 e 2023 co-financiado con fondos europeos Next Generation”.
Dende o Consistorio de Ribeira destacan que a Rede ten liñas de traballo abertas de índole interna (realizando accións de asesoramento e promovendo o intercambio de experiencias e boas prácticas entre os seus membros) e tamén externas (dando visibilidade aos destinos turísticos intelixentes nos ámbitos nacional e internacional e contribuíndo a poñer de manifesto o liderado de España en intelixencia turística).
A Rede conta actualmente con 29 membros galegos: 16 concellos (Arzúa, Melide, Monterroso, O Pino, Ourense, Palas de Rei, Paradela, Pedrafita do Cebreiro, Portomarín, Samos, Santiago de Compostela, Sanxenxo, Sarria, Triacastela, Vigo e Vilagarcía), 3 deputacións (Lugo, Ourense e Pontevedra), 3 mancomunidades (Mancomunidade de Municipios Galegos do Camiño Francés, Mancomunidade do Salnés, Mancomunidade Barbanza Arousa), 3 asociacións (Asociación de Concellos do Camiño Inglés, Asociación de Desenvolvemento Rural Condado-Paradanta e Asociación para a Xestión do Xeoparque Cabo Ortegal), o Consorcio de Turismo e Congresos da Coruña, Turismo de Santiago de Compostela e dous colaboradores: Avivae Soluciones Estratégicas e Destination Lab Consulting.
