A Policía Nacional de Ribeira detén a un individuo por un roubo con forza en establecemento hostaleiro

Comisaría da Policía Nacional en Ribeira

Axentes da Policía Nacional adscritos á Comisaría de Ribeira procederon á detención dun home de 46 anos de idade, como presunto autor dun delito de roubo con forza cometido nun establecemento de hostalaría. A detención levouse a cabo logo “dunha ardua investigación”, sinalaron fontes da Comisaría en Ribeira.

Segundo engadiron, o propietario do establecemento denunciou en dependencias policiais ser vítima dun roubo con forza no mesmo. Tras arrincar o enreixado que protexe unha xanela e forzala, accederon ao interior, forzando a máquina comecartos, da cal subtraeron certa cantidade de diñeiro. Así mesmo forzaron a máquina de tabaco, levándose varios paquetes. En ambos os casos causaron cuantiosos danos nas máquinas. Ademais, subtraeron varias botellas de bebidas alcohólicas e comestíbeis.

Ao detido cónstanlle numerosos antecedentes policiais, a maioría por delitos contra o patrimonio e contra as persoas.

Tras tramitarse as correspondentes dilixencias policiais, o detido é posto a disposición do Xulgado de Instrución número Uno de Ribeira, en funcións de garda.