A hostalería e o lecer nocturno de Galicia recuperan os horarios prepandemia


A Xunta de Galicia eliminará desde este sábado, 12 de febreiro, as restricións de horarios para hostalería e o lecer nocturno co que recuperarán as horas de peche de antes da pandemia, que se declarou en marzo de 2020.

Desta forma, desde os bares, ata os restaurantes e locais de lecer nocturno recuperarán o horario que recolla a súa licenza en cada un dos casos, segundo anunciou o presidente da Xunta, Alberto Núñez Feijóo, tras a decisión aprobada na reunión do seu Goberno este xoves e seguindo a decisión do comité clínico, dado que a evolución da pandemia é boa, “á baixa, lenta pero segura”.

Unha decisión que saúda o sector hostaleiro galego, aínda que “despois de dous anos” de pandemia, os profesionais prefiren ser cautos e esperar “a que salga no Diario Oficial de Galicia (DOG)”, para coñecer exactamente o alcance desa medida, segundo o presidente de Hostalería de Galicia, a organización que agrupa ás catro asociacións provinciais de hostalería e turismo galegas, Cheché Real

“Se aos poucos imos recuperando a normalidade a reacción non pode ser outra que a satisfacción”, dixo Real, aínda que o sector espera volver traballar máis pronto que tarde coas mesmas condicións que antes da pandemia, “en todos os sentidos”.

“A nosa aspiración é volver traballar ao 100 %, tal e como aparece reflectido nas nosas respectivas licenzas de actividade”, sinalou o presidente de Hostalería de Galicia, afirmando que “Estamos no noso dereito. É o noso dereito, recuperar a actividade que figura nas licenzas que nos outorgan os concellos”.