O Concello de Ribeira licitou unha nova fase da instalación de plataforma única na rúa Rosalía de Castro: concretamente no treito comprendido entre Marcial del Adalid e a rúa Irmandiños. A actuación comporta un investimento de 217.900,30 euros e ten unha duración de catro meses.
Os traballos implican a substitución do aglomerado existente por formigón semipulido na mesma tonalidade que no tramo adxacente, intercalando franxas transversais de granito. Tocante ás beirarrúas, serán substituídas por outras de granito silvestre. Tamén se instalarán uns novos granitos de bordo.
A intervención está enmarcada no POS+2021. As empresas interesadas dispoñen ata o 14 de febreiro á medianoite para presentar as súas ofertas a través do Sistema de Licitación Electrónica da Xunta de Galicia.
