Costas confirmou a adxudicación do proxecto de derrube do Colexio de Portosín

A recuperación da contorna da praia da Coira ocupada polo actual Colexio de Portosín vén de dar novos avances cara a súa materialización. O pasado xoves 20 de xaneiro a zona foi visitada polo xefe da Demarcación de Costas do Estado, Rafael Eimil, quen lembrou na compaña do alcalde Luis Oujo, que xa foi adxudicada a redacción do proxecto para a demolición do centro docente, un proceso que lle compete ao dito departamento do Goberno.

O rexedor e o xefe da Demarcación de Costas fixaron os prazos do proceso, un proxecto no que teñen parte activa tres administracións (Costas do Estado, a Xunta e o Concello). Na folla de ruta inclúese dar luz verde ao plan especial de infraestruturas e dotacións, co que o Concello obterá vía libre para a adquisición da superficie que ocupará o novo colexio, antes de que remate o verán, con vistas a que estea habilitado no curso académico 2023-2024.

Pola súa banda, a demolición do inmóbel antigo, o de Coira, dará comezo durante o ano 2023. A previsión é que as obras duren uns nove meses.

Na xuntanza do xoves 20 tamén se fixo saber que a superficie que quedará libre trala demolición do dito previa acubillará unha área de lecer, que incluirá un novo parque infantil que achegue unha alternativa máis ampla e soleada ao existente na actualidade no centro da vila. Oujo lembrou que se trata da resposta a unha demanda veciñal que vén de antigo, pero á que non puido darse resposta cumpridamente até o de agora ante a inexistencia dun predio que achegase as características requiridas.

6.600 metros cadrados

Volvendo ao novo centro docente proxectado, contará cunha área dispoñíbel de máis de 6.600 metros cadrados, dos que a edificación en si mesma ocupará 2.666 metros cadrados, complementándose con trinta prazas de estacionamento interior. Disporá de dous andares, con tres unidades de Infantil e seis de Primaria, amais de comedor, pista cuberta, ximnasio, biblioteca e outras estancias. Amais, a nivel de deseño e construción, o inmóbel que substituirá ao edificio emprazado durante anos a carón da praia de Coira será o segundo da nosa Comunidade construído integramente segundo o Plan de Nova Arquitectura Pedagóxica (tras o novo colexio de Milladoiro, Ames), a folla de ruta do Goberno galego para o deseño dos centros educativos post-COVID, un modelo que aposta de cheo pola amplitude de espazos, a integración na contorna, a accesibilidade e a versatilidade (veñen preparados para dar resposta ás necesidades do ensino das vindeiras décadas). Dará resposta a unha poboación escolar de 900 alumnas e alumnos, sendo a previsión de que estea rematado ao longo do curso 2023/2024.