Alfonso Rueda, na presentación do proxecto de sustentabilidade e innovación turística de Ribeira

O vicepresidente primeiro da Xunta, Alfonso Rueda, e o alcalde Manuel Ruiz, participaron este 1 de decembro na presentación do proxecto impulsado polo Concello para optar aos Plans de Sustentabilidade Turística en Destino, contribucións promovidas pola Unión Europea a través dos fondos Next Generation. A proposta ribeirense foi unha das consideradas aptas polos técnicos da Xunta e do Goberno central para optar aos recursos do Plan do Litoral no marco da convocatoria extraordinaria dos Plans de Sustentabilidade Turística en Destino (PSDT).

O Plan do Litoral suporá un investimento total de case 30 millón, destinados aos Plans de Sustentabilidade presentados por entidades locais e ás tres Accións de Cohesión en Destino desenvolvidas desde a Xunta.

No caso dos PSTD permitirán reforzar Galicia como destino seguro e sustentábel a través dos fondos Next Generation asignados á comunidade galega para o desenvolvemento de accións no litoral como a presentada por Ribeira.

Alfonso Rueda lembrou que os proxectos cumprían cos requisitos esixidos pola Estratexia de Sustentabilidade Turística en Destino da Secretaría de Estado de Turismo, isto é, transición verde e sustentábel, eficiencia enerxética, transición dixital, calidade e vocación turística do destino, ademais do carácter litoral do plan.

Os detalles da proposta de Ribeira

A proposta Ribeira, destino litoral sostible pretende a rexeneración e a posta en valor da contorna litoral do municipio abrindo Ribeira ao mar, coa creación de sendas peonís e ciclistas, ademais de apostar pola recuperación do patrimonio etnográfico e a creación de produtos turísticos que salienten os seus atractivos.

Entre as iniciativas máis destacábeis figura a creación do Museo do Mar, a posta en marcha dun corredor ecolóxico cicloturístico no litoral entre Santa Uxía de Ribeira e Ameixida, pasando por Castiñeiras e a Fonte Seca; a humanización de espazos de gran potencial turístico, como os exteriores do Faro de Corrubedo; a colocación estratéxica dun miradoiro e punto de interpretación da paisaxe en Punta Castro ou a reconversión da zona de San Roque nun parque periurbano.

O concello tamén botará man das novas tecnoloxías para a súa proxección turística. Así, no programa Ribeira, destino intelixente encádrase a creación dunha oficina de turismo virtual con alertas, aplicacións específicas e ferramentas dixitais. O proxecto complétase cun plan de sinalización integral dos recursos turísticos.