Este venres 12 de novembro o Concello de Dodro vai co-organizar unha actividade para fomentar a calidade de vida entre a veciñanza, unha cita abeirada ao ciclo de charlas sobre benestar que pon o foco neste contexto actual de progresiva desescalada post-confinamento e post-pandémica.. Dará comezo ás 17.00 horas, no local municipal do Centro de Día de Dodro.
Servirá para presentar as liñas de traballo da asociación Andaina Pro Saúde Mental, unha entidade galega con todo tipo de recursos a disposición das persoas para axudalas a recuperarse, coas meirandes afouteza e capacidade de superación, das consecuencias dunha pandemia que, non podemos esquecelo, aínda segue presente.
A charla vén da man de Servizos Sociais do Concello de Dodro e colabora a dita asociación.
Andaina Pro Saúde Mental é unha asociación sen ánimo de lucro que naceu no ano 2010 para cubrir un baleiro que existía na atención global ás persoas con este tipo de problemas das zonas rurais próximas a Santiago de Compostela. O seu propósito é “achegar apoio ás persoas con problemas de saúde mental, aos seus familiares e achegados, fomentando a súa autonomía e dando sentido ao seu desenvolvemento cotiá”. Para iso, a entidade aposta de cheo “por unha vida activa a nivel físico, social e laboral”.
