O pasado xoves 4 de novembro a sede da Comunidade de Montes de Baroña acolleu unha reunión informativa coa veciñanza da parroquia sobre as obrigas e dereitos relativas á xestión da biomasa forestal nas faixas secundarias, que é o ámbito que comprende os 50 metros dende o límite das aldeas e nas que, segundo informaron os responsábeis da Comunidade, “non pode haber especies forestais como pino, o eucalipto ou as acacias”. Ademais, sinalaron, ditos terreos deben estar rozados antes do 30 de marzo de cada ano.
Na cita tamén participaron técnicos da empresa SEAGA, que responderon ás preguntas dos veciños sobre as ditas obrigas e dereitos. Asemade, acudiu á reunión o responsábel de Medio Ambiente do Concello de Porto do Son, Manel Deán, que tamén contribuíu a resolver as dúbidas da veciñanza.
Os asistentes puideron visualizar, coa axuda do computador, as súas fincas ditas dentro deste ámbito de protección contra incendios forestais, e mesmo se lles axudou a cubrir unha instancia para facer alegacións sobre as parcelas e o seu estado ao Concello de Porto do Son xustificando o cumprimento da obriga establecida ou mesmo corrixindo erros. Ou sexa, se os terreos son de labradío, se conta con froiteiras, se mostra un erro catastral, etc.
