Juan Caballero (texto e imaxes). O Real Club Náutico Portosín acolleu este venres 5 de xuño a presentación da súa nova xunta directiva, un acto social conducido polo seu presidente, José Codesido López, no que, un a un, foi dando a coñecer aos membros que a conforman.
Compóñena nove directivos, coa súa principal figura que é o seu presidente. José Codesido López é médico de profesión, exercendo na especialidade de xinecoloxía. Amante dos deportes náuticos ten o título de capitán de Iate e aínda cando participou en innumerables regatas a bordo da súa Meigas Fóra, tamén practica a natación da que é un gran afeccionado.
Fernando González Pousa, vicepresidente
Coa experiencia de ser presidente do Real de Portosín desde 2010 ata 2016, asume a área de persoal, servizos xerais e regatas. “A súa experiencia e coñecemento do club son un activo extraordinario para esta xunta”, en palabras de Codesido.
Juan Concheiro Liñares, secretario
Encárgase das funcións de secretaría e do asesoramento xurídico. Avogado de profesión, armador do Virginiano e socio de toda a vida, representa a combinación de rigor, sentido común e amor polo mar.
Miguel Reboreda Tourón, comodoro
Faise cargo de instalacións, regatas, apoio á escola e de todo o relacionado coa informática. É físico de profesión, armador do veleiro Escora e creador do programa Escora de seguimento de regatas.
Ana Martínez Fernández, tesoureira
Será a responsable da xestión económica do club. Despois de toda unha vida dedicada ao ámbito da administración, chega a esta responsabilidade coa experiencia que só dan os anos de traballo ben feito.
Marcos Fernández Fuertes, vogal responsable da escola
Representa a unha xeración moi importante para o Club: a dos regatistas que creceron e aprenderon nel, levando o seu nome por todo o mundo en competicións internacionais. O seu obxectivo é achegar esa experiencia para seguir mellorando a escola e ofrecer aos alumnos e alumnas as mesmas oportunidades que el tivo.
Xaquín Fernández Álvarez, vogal de comunicación, redes sociais, prensa e apoio ao comodoro en mantemento
Farmacéutico de profesión e socio desde que naceu, foi regatista da escola desde Optimist ata o 420. Con posterioridade formouse como adestrador e segue profundamente vinculado á actividade deportiva do club.
Pablo Reboreda Díaz, vogal de eventos e tenda náutica
Medrou entre pantaláns, regatas e actividades náuticas, polo que coñece perfectamente o ambiente e as necesidades dos socios. Será unha peza importante na organización de eventos e no desenvolvemento de novas iniciativas.
Pablo Oliver Iglesias, vogal responsable de pádel, ximnasio e apoio en actividades sociais
Enxeñeiro de Organización Industrial e profesional de Inditex, onde desenvolve a súa actividade na área de sustentabilidade de Zara Home. É armador do veleiro Acheron e conta ademais cunha importante traxectoria deportiva, sendo convocado durante cinco tempadas para o equipo galego de vela.
Durante o transcurso da tarde tamén se presentou o novo servizo de hostalería e restauración, que baixo o nome de Salitre está rexentado por Cristina, profesional con ampla experiencia en restauración e xestión de clubs sociais. Onda ela incorporarase un equipo familiar e próximo, cunha proposta gastronómica baseada no produto, a cociña sinxela ben elaborada e unha especial atención á grella e as brasas.
“Antes de mirar o futuro, quero expresar o noso agradecemento a quen nos preceda. O Real Club Náutico de Portosín non sería o que é sen o traballo dos presidentes, directivos, traballadores, patrocinadores, colaboradores e socios que durante décadas dedicaron tempo, ilusión e esforzo a construír este club”, comezaba dicindo na súa alocución o presidente.
“Nós recibimos hoxe un legado valioso. Un club con prestixio, con historia, con actividade deportiva e cunha forma de entender o mar que o converteu nunha referencia en Galicia”, explicaba Codesido.
“Queremos mellorar as nosas instalacións, ampliar oportunidades para os socios, fortalecer a nosa actividade deportiva, reforzar a nosa colaboración coas administracións e continuar contribuíndo ao desenvolvemento da náutica en toda a ría de Muros e Noia. Farémolo con ilusión, con traballo e con diálogo”, terminaba dicindo na súa intervención o novo presidente.
Ao acto asistiron a tenente de alcalde do Concello de Porto do Son, María José Maroñas; a deputada provincial de Infraestruturas Viarias e Obras Provinciais, Mónica Rodríguez; a directora territorial da Consellería de Presidencia, Xustiza e Deportes da Xunta de Galicia, María del Mar Ferreiro; e o patrón maior da Confraría de Pescadores de Portosín, Marcos Vázquez.
