Os socialistas de Ribeira, da man do concelleiro José Manuel Suárez-Puerta Sirgado, presentaron un novo requirimento ao Concello para que sexan solucionados de urxencia os problemas de salubridade e accesibilidade que presenta a rúa Correos. A petición, que será tratada no pleno da Corporación, pon o foco no estado no que se atopa a dita vía, “un estado de deixamento e abandono que a converten nun lugar sucio, cheo de maleza e mesmo perigoso para andar por ela”, sinala o PSOE de Ribeira, engadindo que recentemente tivo noticia dun accidente ocorrido a unha persoa que circulaba por ela e que debido ao mal estado do pavimento e á mala iluminación terminou nun contratempo que “afortunadamente e só grazas á casualidade, non rematou de xeito tráxico”.
O Grupo Municipal Socialista presentou nesta lexislatura unha proposta, que non foi aprobada, solicitando a finalización da rúa “executando a fianza da obra existente”, que fai esquina coa rúa de Lugo e que, sinalan, “atópase en estado de abandono”. Os socialistas indican que a estrutura está finalizada até a altura da calzada da rúa Correos, polo que o recheo da gabia existente tras o valo e a
retirada da mesma até aliñala coa estrutura “é posíbel”, explican, engadindo que con esta solución a rúa “pasaría a converterse en zona de paso e de uso e goce dos veciños da zona”.
