O Bloque Nacionalista Galego de Ribeira vén de emitir un comunicado no que reflicte as peticións da veciñanza de Axeitos, que, segundo apuntan os nacionalistas, precisan que se arranxe o acceso ao paseo fluvial do río Artes-Sanchanás dende o devandito lugar da parroquia de Oleiros.
Os nacionalistas explican que, malia estar sinalizado, “o camiño tan só ten unha parte pavimentado con cemento e outra parte está nun estado intransitábel, pois, é unha lameira que recolle a auga que vai da fonte”. Así, indicou o voceiro do BNG Xosé Vázquez Cobas, “a non ser que se vaia con botas de auga, é imposíbel achegarse ao río, e se no verán xa é difícil acceder, en tempo de chuvia faise imposíbel”.
Desde o BNG apuntan que a veciñanza “leva tempo demandando algunha actuación que mellore este camiño pero o Goberno local fai oídos xordos ás peticións que se lle fan”. O voceiro criticou ao Concello porque considera que “esquece as necesidades das parroquias e centra o gasto en cementar o centro urbano ribeirense”. E engade: “Desde o BNG entendemos que estas pequenas cuestións deberían ser atendidas polo Executivo local de maneira prioritaria porque supoñen molestias importantes que padece a veciñanza do rural e que, con pequenos investimentos e actuacións, se poden solucionar”.
O BNG insta a que “se canalice a auga e se estude algunha pequena actuación que permita dar solución ao problema descrito sen máis demoras no tempo”.
