Nos últimos tempos é coma se os nostálxicos do franquismo e os simpatizantes de ideoloxías de extrema dereita saísen das súas cavernas para manifestar publicamente o seu desprezo contra todo o que se move e o que non lles gusta na súa limitada perspectiva vital do que é para eles a liberdade, a democracia e o respecto polos demais que non pensan como eles.
Teñen un odio enfermizo en contra dos inmigrantes, os homosexuais e as feministas porque atentan contra a súa ideoloxía supremacista e o seu prototipo de raza aria, que tanto nos lembra a tempos non moi afastados. Son intolerantes, violentos e carentes da máis mínima educación e respecto cara aos demais.
Chama a atención que manipulan todo tipo de imaxes e lanzan toda clase de bulos para denigrar aos inmigrantes, culpándoos de delincuentes, violentos e violadores, sen ruborizarse. Parecen esquecerse de cando saían, por motivos de traballo ou por mero turismo, a eses países do chamado terceiro mundo e abusaban ou violaban a nenas e mulleres, por un par de dólares ou unha botella de whisky, que sofren pobreza extrema ou miseria económica.
Esa xente nostálxica e supremacista adquire a súa forza ante o silencio cómplice do resto da poboación. Non podemos deixarlles que continúen mentindo e intoxicando a unha parte da poboación coa xenofobia, o odio e o rancor a unha gran parte da cidadanía que desexa vivir en paz e cos valores que inspiraron á propia Unión Europea e aos organismos internacionais. Temos que seguir loitando para seguir reforzando a nosa Democracia e protexendo o noso Estado de Dereito.
