Bandeira Papers – Pedro Pérez

Nos últimos días saíu á luz a investigación periodística internacional Pandora Papers froito dun traballo de numerosos medios de comunicación que desvelan o perverso funcionamento dos paraísos fiscais. Julio Iglesias, Pep Guardiola ou Miguel Bosé son só algún dos personaxes españois máis destacados que aparecen na investigación, que mostra o alcance masivo da evasión fiscal de gobernantes, famosos e empresas.

É curioso ver como a publicación dunha investigación de tal calibre e que pon entre a espada e a parede a moitas persoas famosas, apenas causa un impacto na sociedade. Sen embargo cando se deron os casos de forma individual, como puido ser o de Messi, a expectación foi máxima, quizá porque a noticia nese momento fose esa, e a día de hoxe tanto a COVID-19 como o volcán da Palma están eclipsando un traballo enorme por parte do periodismo internacional. Outra das opción que se barallan para explicar esta normalización é que non se trata dun problema puntual, se non dun problema sistemático. A continuidade coa que saen noticias relacionadas con contas offshore é tal que a sociedade media non se sorprende.

Outro punto que tamén deixa claro esta situación ten que ver co patriotismo, cuxa única intención é desarmar e dividir á poboación. Son moitos os personaxes famosos que fan declaración con respecto á nación e a patria, pero o que queda claro é que a clase poderosa, independentemente da bandeira coa que se cubra, para eles a única patria é o diñeiro, sen importan o prexuízo que cause no pobo ao que pertence e que defende coas súas palabras, pero non cos seus actos. Porque o patriotismo non é só sacar unha bandeira, se non pagar os impostos que corresponda, e cos Pandora Papers aínda que mellor dito sería cos “Bandeira Papers”, queda máis que demostrado.