A colaboración entre a Universidade de Santiago e o Concello de Ribeira vén de dar un novo paso, e faino co terceiro curso da sede do IV Ciclo da USC, que ten aberto o prazo extraordinario de matrícula até o 10 de setembro. Segundo informa o Concello, todas as persoas maiores de 50 anos que o desexen poden formalizar a súa matrícula na páxina web da Universidade de Santiago.
O Goberno de Ribeira engade que a formación universitaria a partir dos 50 anos é posíbel na localidade grazas ao convenio asinado en 2019 entre a USC e o Concello de Ribeira. A creación dunha sede universitaria do IV Ciclo dirixida a persoas maiores de 50 anos, promove a formación continua, a democratización dos estudos universitarios…, en definitiva a universalización da formación universitaria trasladándoa da capital de Galicia á cabeceira da comarca do Barbanza.
Este curso 2021-2022 a oferta formativa na sede de Ribeira do IV Ciclo da USC é a seguinte:
1º cuadrimestre: Nutrición; Patrimonio Bibliográfico; Aprendizaxe Emocional e Benestar
2º cuadrimestre: Introdución á Zooloxía; Psicoloxía; Historia da Arte Galicia.
As docentes de Nutrición son Nuria García Couceiro e Lucía Ordóñez Mayán; os de Patrimonio Bibliográfico e Documental, Arturo Iglesias Ortega e Xosé M. Sánchez Sánchez; as de Aprendizaxe Emocional e Benestar, Mª del Carmen Gutiérrez Moar e Pilar Riveiro López; o de Introdución á Zooloxía será Javier Iglesias Piñeiro; o de Psicoloxía, Onésimo Juncos Rabadán; e a de Historia da Arte de Galicia, Mª Dolores Barral Rivadulla.
