Este proxecto forma parte do programa O teu Xacobeo da Xunta de Galicia.
Os vindeiros días 16 e 17 de setembro durante toda a xornada, a Asociación Galega Cultura e Desenvolvemento Rural, estará no Concello de Drodo, A Coruña, recollendo as testemuñas dos peregrinos e peregrinas que marchan ao seu paso pola Ruta do Mar de Arousa e Río Ulla cara a Santiago de Compostela.
UN CAMIÑO DE HISTORIAS é unha iniciativa que trata de recuperar a historia das peregrinacións a Santiago de Compostela por medio da fotografía e das testemuñas dos primeiros aventureiros e aventureiras, expertos do camiño, para comparalas coa visión das peregrinas e peregrinos, e poboación local actuais.
Nesta segunda edición queremos ampliar o alcance do proxecto, aproveitando o know how adquirido na primeira fase, para investigar o impacto social, cultural e económico dos Camiños de Santiago no rural galego, recollendo as testemuñas da poboación local e peregrina e favorecendo o diálogo e o intercambio entre ambas. Con este diálogo analizamos as necesidades actuais e promovemos a reflexión crítica e a sensibilización sobre as novas opcións de desenvolvemento económico que propician as rutas de peregrinación no rural galego.
Proxecto promovido pola Asociación Galega de Cultura e Desenvolvemento Rural, coa colaboración de Phottic, e financiado pola Axencia Galega de Turismo dentro do programa de axudas para a dinamización do Xacobeo 2021 para os anos 2019 e 2020.
