Este sábado 4 de setembro toca baixar á praia a prol do medio ambiente. Concretamente á praia de Aguieira, en Porto do Son, onde está prevista unha Xornada de Concienciación Ambiental que contará coa presenza activa do deportista olímpico local Iago López Marra e da tamén olímpica Kahena Kunze (regatista brasileira). A xornada vén da man da Concellería de Medio Ambiente de Porto do Son, en colaboración coa Real Club Náutico de Portosín, a Confraría de Portosín e máis a Escola de Surf As Dunas.
Na presentación participaron os devanditos deportistas e máis o concelleiro de Medio Ambiente, Manel Deán, e o patrón maior de Portosín, Isaac Gaciño. O edil lembrou que a participación de López Marra en accións ambientais xa vén de lonxe e tense materializado en xeiras de traballo (centradas sobre todo en recoller plásticos e outros refugallos) na praia de Coira, en Portosín. O concelleiro engadiu que a presenza destes dous campións olímpicos vai contribuír a visualizar a importancia de coidar o noso medio mariño e as nosas praias.
A xornada enmárcase na campaña Infinitamente Natural, iniciada co arrinque do verán.
Iago López Marra explicou “temos a gran sorte de viaxar por todo o mundo e ver a cantidade de lixo que se deposita en terra que ao final acaba no mar. É un tema que nos preocupa moito, porque o mundo que temos é un e non hai máis opcións. Estamos moi comprometidos con iso e tratamos de facer ver ás novas xeracións que o importante está por vir e que temos que coidar o medio ambiente e tratar de utilizar menos, que é o gran problema hoxe en día”.
As persoas que queiran participar na xornada deberán acudir o sábado ás 11.00 horas á praia de Aguieir, a carón do chiringuito (punto de encontro). Ao fío das 13.00 horas procederase á clasificación do lixo, en colaboración con Protección Civil de Porto do Son.
