A directora de Xuventude, Cristina Pichel, visitou este 3 de setembro o Campamento Xuvenil Virxe do Loreto, de Porto do Son, onde se está a desenvolver a última quenda estival de actividades. Pichel aproveitou a súa xuntanza coa mocidade participante no campamento sonense para facer balance do acadado estes meses en materia de lecer: “A campaña de verán 2021 foi todo un éxito e permitiu ofrecer á xuventude un espazo de diversión e ocio seguro con todas as garantías”, sinalou.
O campamento Natureza xunto ao mar acolleu cinco quendas ao longo do verán nas que os participantes, de entre 13 e 17 anos, puideron desfrutar de actividades acuáticas como surf, bodyboard ou kaiak. Este sábado rematarán os rapaces que pasaron a última semana nestas instalacións.
Cristina Pichel destacou que “a Xunta apostou un ano máis pola campaña de verán mellorando e incrementando a oferta de actividades para a mocidade”. Neste sentido, engadiu que “foron un total de 7800 prazas, mil máis que o ano pasado, e preto de 200 quendas en diferentes localizacións de toda a xeografía galega”.
