A Asociación Boirense de Empresarios (ABE) puxo en marcha está semana unha campaña de promoción comercial para os seus asociados, desta volta trátase dunha iniciativa que ten “como obxectivo liquidar os stocks dos comercios nas propias tendas”. A campaña, que se desenvolve baixo o nome de Stocks Fóra Boiro, celebrarase o xoves 26, venres 27, sábado 28, e luns 30 de agosto.
Os comercios, durante estas datas, terán sinalizados os produtos que se porán á venta a prezos de liquidación cos carteis elaborados especificamente para esta campaña (para que o cliente identifique claramente os artigos).
Con esta iniciativa, a ABE pon o punto e final ás rebaixas de verán. “A través dela”, explica a patronal, “os clientes poderán adquirir produtos a prezos súper rebaixados no remate final da campaña ademais de poder ver xa nas tendas o adianto da tempada comercial de outono”.
Stocks Fóra Boiro coincide tamén cos últimos días da campaña Quincenas Fantásticas que leva en marcha dende o 1 de xullo e na cal as e os clientes poden rexistrarse ata o 31 de agosto a través da web www.abe.gal os seus tíckets ou facturas de compra de calquera das 200 empresas asociadas á ABE (son válidos os tíckets de compras realizadas entre o 01 de xullo e o 31 de agosto). O sorteo dos últimos 500€, en total foron 2000€, realizarase o próximo mércores 1 de setembro.
