A Policía Nacional de Ribeira detén ao presunto autor do atraco a unha taxista

Axentes da Policía Nacional adscritos á Comisaría de Ribeira procederon este 17 de agosto á detención dun home de 45 anos, veciño de Ribeira, como presunto autor dun delito de roubo con violencia contra unha taxista mentres esta realizaba o seu traballo.

O agora detido, tras rematar o servizo de desprazamento, negouse a pagar e comezou un tirapuxa coa taxista, podendo arrebatarlle pola forza 370 euros aínda que antes deulle unha dentada na man que lle produciu á muller lesiones sanguentas.

Ademais de que a vítima coñecía polo seu alcume ao autor da agresión e o roubo, a este na fuxida caéronselle catro cartóns de crédito onde figura o seu nome e apelidos.

A detención produciuse grazas á colaboración cidadá xa que foi unha chamada telefónica anónima á Comisaría a que situou ao autor do atraco nun lugar determinado de Ribeira, o que facilitou a súa detención.

No momento da detención, o delincuente, ao que lle constan varios antecedentes policiais por feitos similares, ofreceu resistencia activa contra os policías debendo ser reducido e inmobilizado no chan.

Ao agora detido tamén se lle atribúe a comisión dun delito de roubo con forza do que puido fuxir á carreira tras ser sorprendido, sucedido o pasado 11 de agosto nun bar da zona de Castiñeiras xunto a un compañeiro de roubos, aínda que, este último si foi detido in fraganti, pasando a disposición xudicial no seu día.

Tras tramitarse as correspondentes dilixencias policiais, dáse conta de todo o actuado ao Xulgado de Instrución de Garda de Ribeira, pondo ao detido á súa disposición polo delito de roubo con violencia e o delito de roubo con forza.