Máis de 200 veciños de Boiro fixeron uso da OMIX para activar o Carné Xove

O Concello de Boiro, a través da Oficina Municipal de Información á Xuventude (OMIX) puxo en funcionamento un servizo para activación do Carné Xove para a mocidade do municipio sen necesidade de desprazarse aos puntos de activación. Dende que se puxo en funcionamento, máis de 200 mozos e mozas fixeron uso deste servizo para pór en funcionamento as súas tarxetas.

A Dirección Xeral de Xuventude emite dende este 2021 o Carné Xove de maneira gratuíta para persoas entre os 12 e os 30 anos con descontos e vantaxes para a mocidade. Para o seu uso é preciso activalo nos puntos de Espazo Xove da Xunta de Galicia ou vía telemática.

Co obxecto de facilitar o servizo de activación, o Concello de Boiro ofrece a posibilidade de que a mocidade leve á OMIX as súas tarxetas e estas envíanse semanalmente para a súa activación. Toda a información sobre a tarxeta está a disposición das persoas usuarias na OMIX de Boiro, situada no Centro Social, ou no teléfono 881 055 269.