Javier Ariza e Raquel Queizás animan en Boiro o remate de xullo con dous espectáculos

A axenda cultural de Boiro remata o mes de xullo con dúas actividades moi indicadas para estimular a creatividade e o maxín do público infantil e familiar. Trátase, en primeiro lugar, do espectáculo Carman, antes es mejor, de Javier Ariza, que se representa este luns 26 de xullo na praza de Galicia, a partir das 21.30 horas. A cita, de capacidade limitada (con reserva de entradas dispoñíbel a través de boiro.gal), é “unha comedia rueira, circense e participativa cun excéntrico showman e un Seat 600 cheo de sorpresas”. Haberá comportas que se abren, mecanismos que se activan, obxectos que aparecen, sons, luces e efectos de todo tipo, clown, malabares e manipulación diversa (e sorprendente) de obxectos.

Polo que respecta á segunda das citas desta recta final de xullo, será Cinema Marabillas de Raquel Queizás. Representarase o venres 30 de xullo, a partir das 22.00 horas, na Igrexa do Carme de Cabo de Cruz. Cinema Marabillas é un espectáculo da narradora, actriz e escritora Raquel Queizás para público infantil e familiar.

A cita tamén terá capacidade limitada e haberá que reservar praza, novamente, na web municipal (www.boiro.gal). Será un encontro cos principais personaxes dos contos que fixeron voar a imaxinación dunha chea de nenas e nenos de moi diversas xeracións, como Alicia no país das Marabillas, Peter Pan ou O Mago de Oz. O obxectivo é facer ver ás crianzas e as súas familias que esas historias cinematográficas e literarias poden contarse de diferentes maneiras. Non faltará aventura, humor, misterio, tenrura, maxia, fantasía e sobre todo moita imaxinación.