O Concello de Boiro comezou esta semana a execución das obras da cuberta con iluminación solar fotovoltaica para o parque infantil da Praza de Galicia. A actuación, valorada en 247.740,25 euros, conta co financiamento do Plan Único (POS+) da Deputación da Coruña.
O Goberno local explica que “esta obra permitirá crear unha cuberta tipo pérgola duns 22×32 metros para que funcione como abrigo do espazo de xogos e lecer e tamén do espazo contiguo destinado a parada do transporte público”.
A estrutura estará formada por pórticos de madeira laminada e o peche da cuberta realizarase a base de láminas de policarbonato celular de 16 milímetros e protección dos raios UV.
A cuberta vai contar con iluminación mediante tiras LED e cargadores USB de intemperie en zonas accessíbeis, un sistema que será alimentado mediante paneis solares fotovoltaicos.
“Esta actuación para cubrir o parque infantil da praza de Galicia da resposta a unha importante demanda da veciñanza e que os cativos teñan un lugar no que xogar nos días de choiva así como cubrir a parada de autobús e o acceso do aparcamento público evitando as filtracións de auga que se viñan producindo”, afirmou o alcalde, José Ramón Romero.
