O Concello de Boiro iniciou as obras para o acondicionamento do depósito municipal de vehículos. Estanse a facer nuns terreos en Espiñeira de 1.100 metros cadrados de superficie, preparándoos para dar o mellor servizo dentro do seu cometido. Esta actuación vaise levar a cabo con cargo ao Plan de Obras e Servizos da Deputación da Coruña por un importe de 135.170,99 euros.
En concreto, os traballos diríxense a acondicionar un espazo pechado e pavimentado que terá capacidade para uns cincuenta vehículos e “dar así solución ao problema actual para o depósito de vehículos na vía pública”, explicou o Concello, engadindo que “as administracións locais teñen a obriga da custodia axeitada dos vehículos retirados mentres non se resolven os procedementos xudiciais e, na actualidade, non se dispoñía dun espazo acondicionado para este fin”.
Neste momento estase procedendo ao baleirado de vehículos para proceder ao nivelado do terreo e a instalación de rede de recollida de pluviais con separador de graxas para evitar verteduras na rede pública. Levarase a cabo o pavimentado do espazo e a instalación de alumeado público para “garantir as mellores condicións de seguridade na custodia dos vehículos depositados”.
