O Concello de Boiro, para conmemorar o Día Internacional do Orgullo, este luns 28 de xuño, realizou o pintado dun novo paso de peóns coas cores da bandeira LGTBIQ. O lugar escollido para realizar este paso simbólico é Cabo de Cruz, lugar no que, segundo lembra o Goberno local, “hai uns días un veciño do municipio sufriu unhas pintadas homófobas na súa casa por dar visibilidade aos dereitos deste colectivo”.
O Concello de Boiro mostrou a súa repulsa contra “calquera acto homófobo como o acontecido en Cabo de Cruz e rexeita todo tipo de conductas que vaian en contra da tolerancia, o respecto e a diversidade das persoas”. E engade o Concello: “Co pintado deste pazo de cebra, mostramos o noso compromiso por dar visibilidade aos dereitos deste colectivo e, dende a Concellería de Igualdade, trabállase por promover accións que axuden á educación en igualdade”.
O pintado deste paso de peóns en Cabo de Cruz complementa ao que no ano 2020 se pintou xa na praza do Concello e tamén os bancos diante do IES A Cachada que se pintaron coas cores da bandeira para mostrar o compromiso do Concello de Boiro coa diversidade e os dereitos individuais de ser e sentir.
