O programa Dodro Sostible, impulsado polo Concello para favorecer a divulgación ambiental e conseguir un territorio máis respectuoso e aliñado coa conservación do medio natural, é estes días un fervedoiro de actividades.
Por exemplo a actividade Recicla e protexe os océanos, organizada ao abeiro do Día Mundial dos Océanos, que se celebrou este 8 de xuño e, tamén, os días anteriores e posteriores á data en si mesma de celebración.
Segundo fixo saber o Concello, a actividade impulsou a creatividade da rapazada local, que achegou unha chea de traballos artísticos feitos con material de refugallo, reciclado. En concreto, o CRA de Dodro colaborou enviando unha composición de cada colexio na que os nenos puxeron o mellor do seu máis que relevante talento.
Ademais, con motivo do Día Mundial de Medio Ambiente (o pasado sábado), celebrouse o venres 4 de xuño unha xeira de plantación de árbores na que os protagonistas, ademais das propias especies vexetais plantadas, foron as nenas e nenos dos colexios do CRA de Dodro, que encheron as mans de terra e achegaron unha importante contribución ao futuro dos bosques.
A xeira medioambiental da pasada finde terá continuidade o vindeiro 19 de xuño, cunha observación de invertebrados.
