O gromo de COVID-19 do pesqueiro de Aguiño duplica a cifra de contaxios en Ribeira

Este domingo saltaron alarmas no porto de Ribeira ao detectarse un gromo de COVID-19 nun pesqueiro con base en Aguiño que vén de regresar da costeira da anchoa e que tería afectado a oito tripulantes do buque. Como resultado, duplicouse a cifra de contaxios en Ribeira (que pasou, debido tamén a outros contaxios por contactos con positivos, de 12 a 25). Estes e outros datos foron confirmados este domingo polo SERGAS.

Os mariñeiros, que presentan síntomas de febre alta, atópanse neste intre illados. O SERGAS confía en que o virus fique limitado grazas ás disposicións sanitarias que se están a tomar e sempre e cando os tripulantes afectados velen polas medidas de corentena establecidas. Porén, segundo confirmou El Diario de Arousa, un dos mariñeiros que deu positivo, de 34 anos, atópase en estado moi grave na unidade de críticos do Hospital Clínico de Santiago de Compostela.