O Concello de Rianxo impulsou unha iniciativa para incrementar a calidade de vida dos animais, reforzar a atención sanitaria que se lles brinda e, en última instancia, facer medrar as posibilidades de atoparen un fogar en condicións. Trátase do Servizo Oficial de Rescate e Protección de Animais Domésticos do Concello de Rianxo, dende o que se despregan traballos de recollida, manutención, adopción, prevención e demais servizos para o benestar dos animais en situación de desamparo e a loita contra o abandono de animais no termo municipal.
O equipo de rescate e protección ten habilitada unha conta de correo electrónico para facilitar as adopcións entre a cidadanía: info@xeagalicia.com.
O Concello explicou que “todos os servizos son xestionados a través dun centro legal para a xestión dos animais abandonados”. A canle fica aberta para que “calquera veciño do concello, no caso de perda do seu animal, poida facilitar información e imaxes, para difundir dende esta plataforma oficial e asi amplificar as posibilidades de recuperación”.
En palabras do Concello, “trátase dun gran paso para xestionar e loitar contra a lacra do abandono animal”.
