No Son, o Concello convídanos a coñecer Queiruga a través dunha ruta por mar e monte

O Concello de Porto do Son compartiu con nós estes días os importantes atractivos da Ruta de Seiras e Queiruga, un itinerario proposto para coñecer a fondo a fermosa contorna marítima da dita parroquia, que destaca non só polas súas praias senón tamén polas importantes vistas que ofrecen (terra adentro e mar adentro) os seus cantís, promontorios e miradoiros, como por exemplo o do porto natural de Nadelas. Trátase dunha ruta que “nos achega ao mar, ao monte, á arquitectura relixiosa e á arqueoloxía”, sinala o Concello.

Desde a Casa de cultura de Queiruga podémonos achegar por un desvío sinalizado á capela de Porto Nadelas, co seu porto natural e o castro de Queiruga á beira. Tras regresar á ruta bríndasenos a oportunidade de percorrer a costa, as aldeas e de novo a costa polas dunas da praia de Queiruga, enlazando logo co conxunto formado pola capela, a igrexa e a casa reitoral da parroquia. Logo teremos ocasión de subir ata o punto máis alto do itinerario por u un carreiro que nos levará directos aos petróglifos da contorna de Queiruga, entre os que destaca o de Pedra Sartaña.

A ruta presenta 6,60 quilómetros de percorrido e é de dificultade baixa.

Podemos descargar todo o preciso para desfrutala a través de Wikiloc. Tamén está dispoñíbel (toda a información sobre o percorrido) nun PDF habilitado na web do Concello.