ButacaZero, a plataforma creativa dirixida pola rianxeira Esther F. Carrodeguas e Xavier Castiñeira, propón, a través dunha peza de 32m2, unha viaxe cara ao encerro da pasada primavera. Con música de Rodrigo Cuevas, o espectáculo representarase na Casa da Cultura de Boiro o venres 16 e o sábado 17 no auditorio municipal de Vilagarcía.
Para máis información, pódese consultar a páxina web dos concellos ou chamar aos teléfonos 620 113 155 e 675 404 321.
A obra da escritora e actriz rianxeira Esther F. Carrodeguas e Xavier Castiñeira propón unha viaxe cara un pasado recente, co obxectivo de “provocar unha catarse colectiva ante un acontecemento que marcou, e marcará, a vida da sociedade”.
Na obra aparecen Laura Villaverde e Xurxo Cortázar como protagonistas. De feito, o argumento da peza xira en torno a unha parella que reside nun pequeno piso dunha superficie de 32 metros cadrados. Así, por medio de elementos cómicos e tráxicos, 32m2 visualiza a habitual convivencia coa precariedade e as desigualdades nun momento clave para todos.
Os directores da obra, Esther Carrodeguas e Xavier Castiñeira, sinalaron recentemente que “a peza é un enredo co que todo o público se poderá sentir identificado, pois todos mercamos un chisco máis de papel hixiénico do habitual e todas tivemos que acabar por levantar as nosas propias alfombras para descubrir a merda que tiñamos debaixo dos propios pés”.
32m2 é unha peza que pretende curar feridas, despedirse das persoas que marcharon e homenaxear a aquelas que deron o mellor de si para frear a pandemia. Así, Xavier apunta que “para afrontalo temos que pechar etapas. E, sen lugar a dúbida, as mellores chaves son a risa e o pranto”.
