O Concello de Ribeira celebrou cunha homenaxe ás médicas o Dia Internacional da Muller: as profesionais da medicina orixinarias do termo municipal e, tamén, as que exercen no concello a súa actividade profesional. A diferenza das edicións pasadas desta celebración, tratouse dun acto de carácter telemático no que as homenaxeadas estiveron conectadas por vídeo-conferencia. Na sesión online interviñeron tamén o alcalde Manuel Ruiz e a concelleira de Igualdade, Ana Ruiz, na compaña da tenente de alcalde María Sampedro e das tamén edís Elvira Pereira, Ana Barreiro e Juana Brión, entre outras persoas.
O evento contou coas intervencións de tres prestixiosas profesionais: a epidemióloga especializada en xénero María Teresa Ruiz Cantero e máis a xenetista Manuela Gago Domínguez e a oftalmóloga Dora Fernández Agrafojo, estas últimas orixinarias de Palmeira e de Ribeira.
Antes de proceder a unha simbólica entrega de diplomas conmemorativas ás médicas conectadas, Manuel Ruiz subliñou a necesidade de celebrar actos como este para visualizar “moitos dos atrancos que non somos capaces de ver moitas veces e que sen embargo están aí”, afirmando que “non hai mellor cambio que os que nos pode dar a educación”.
