O Concello de Ribeira vai exhibir a partir deste 25 de marzo unha exposición ao aire libre dedicada á Semana Santa en clave local: o seu título Fe, Arte, Contemplación. A mostra, que estará situada no adro da igrexa de Santa Uxía, inclúe unha selección de vinte obras de gran formato tomadas por Lesmes Fotógrafos e dispostas en cinco estruturas modulares con dimensións de dous metros por dous metros. A maior parte delas son en branco e negro e están acompañadas de textos alusivos.
As instantáneas, capturadas en 2019, buscan transmitir “a esencia da Semana Santa na cidade ribeirense a través de imaxes dos distintos fitos que compoñen esta celebración, fitos entre os que se atopan o Domingo de Ramos, o Desencravo ou a procesión do Paso, entre outros”, informaron fontes do Concello.
A inauguración está prevista para o xoves 25 ás 13 horas e estará presidida polo alcalde Manuel Ruiz.
A actividade está promovida pola Concellería de Cultura e conta coa colaboración da parroquia de Santa Uxía.
