A senda de interese medioambiental e turístico que leva á aldea abandonada de Xei (Noia), recentemente mellorada e acondicionada polo Concello, foi obxecto esta fin de semana duns actos vandálicos que se cebaron principalmente nos postos de sinalización, moitos dos cales foron directamente arrincados.
O Concello condenou uns feitos “que non deben ter cabida no noso municipio” e convidou á veciñanza a colaborar coas autoridades para “poñer fin a estes comportamentos incívicos que non fan outra cousa que estragar o que é para desfrute de toda a cidadanía”.
Segundo confirmaron os traballadores do Concello foron recollidos unha ducia de postes de sinalización arrincados dos seus emprazamentos orixinarios, “e había máis que non puideron ser recuperados aínda polas dificultades de sacalos do río, coa súa base de cemento e situados en zonas de certa profundidade”.