Os empresarios de Ribeira mobilízanse este mércores 24 a prol da hostalería

A Asociación de Empresarios de Ribeira vén de emitir un comunicado no que mostra a súa postura respecto dos graves problemas polos que están a pasar os establecementos hostaleiros na actual crise sanitaria e económica, e sobre a necesidade de reclamar plans de rescate para a súa supervivencia. Segundo fai saber a entidade ribeirense, na asemblea realizada este luns 22 tomouse a decisión (por unanimidade de todos os asistentes) de convocar unha concentración este 24 de febreiro.

A mobilización está previsto que comece ás 19.00 horas na praza do Concello, e con ela a asociación quere dar visibilidade á dramática situación na que se atopan a hostalería e a restauración, debido ás medidas de peche decretadas para a súa actividade.

A patronal pide a máxima colaboración, respectando as normas anti-COVID preceptivas, así como levala a cabo dentro “da boa orde” e “o comportamento que se debe para unha actividade reivindicativa pacifica”.