O Consistorio de Ribeira acolleu este venres a entrega dos galardóns dos concursos de decoración hostaleira de Ribeira: un certame impulsado polo Concello na tempada de Nadal para distinguir as mellores creacións de escaparatismo dos locais hostaleiros. Foron tres galardóns (primeiro, segundo e terceiro premio) que puxeron de manifesto o talento e a creatividade do sector en Ribeira.
Así, a Pizzería D’Vicio, a Viñoteca Abuela Gloria e o Bar Snack resultaron os distinguidos conforme os gústame recibidos pola veciñanza na páxina Entérate Ribeira en Facebook. Ademais de cadanseu diploma conmemorativo, obtiveron premios en metálico por valor de 300, 200 e 100 euros, respectivamente.
Novas axudas ao sector
Durante a súa intervención no acto de entrega (no que tamén estivo a concelleira de Cultura, María Sampedro), o alcalde Manuel Ruiz anunciou que se están a estudar novas axudas para a hostalería local, “un dos colectivos máis afectados pola pandemia”. Entre elas, barállase a posibilidade de recibir bonificacións nas taxas deste ano de auga e lixo (das que tamén se beneficiaría o sector turístico) ou novas subvencións, “ben adheríndose a plans promovidos por outras administracións (onte mesmo saíron a resolución definitiva do PEL Reactiva) ou de xeito directo”, dixo, engadindo que están pendentes de realizarse (cando “o permita a situación”) os cursos para a hostalería impartidos polos chefs Kike Piñeiro e Iñaki Bretal. Tamén anticipou que nas vindeiras semanas porase a disposición do sector envases de café para levar, dando así continuidade á iniciativa emprendida a principios de ano co subministro de envases de comida. Tamén se estudan facilidades para as concesións administrativas de competencia municipal, como poden ser algún chiringuito ou o restaurante do mercado.
Por último, Ruiz Rivas manifestou a súa preocupación por outro sector moi afectado pola crise, o dos postos de téxtil que forman parte do mercadiño semanal, para os cales se está a avaliar algún tipo de bonificación na ordenanza fiscal.