A ARE lanza un concurso para conmemorar o Entroido dende as nosas casas

O Entroido da nosa comarca segue vivo, malia a situación pola que estamos a pasar, demostrando a súa total capacidade para adaptarse aos formatos seguros de interacción e comunicación. A ARE (a Asociación Rianxeira de Empresarios) seguiu esta liña e puxo en marcha unha iniciativa para que a veciñanza poida celebrar as festas, plenamente, dende os seus fogares. Trátase dun concurso a través do cal buscarase o mellor disfrace e o prato típico máis apetitoso destas datas.

As persoas que queiran participar só terán que subir unha imaxe da devandita temática nas redes sociais Facebook ou Instagram, etiquetar a ARE na foto e poñer o cancelo (hashtag) #CovidEntroidoNaCasa.

O disfrace e o prato con máis likes gañarán 1 vale de compra de 25€ cada un, para empregar no servizo a domicilio dos restaurantes presentes na plataforma de comercio electrónico Mercarianxo. O prazo de participación será do 10 ao 17 de febreiro. O día 18 de febreiro anunciaranse as dúas persoas gañadoras. Podemos consultar na Rede as bases legais do certame.