O Ministerio de Industria e a Cámara de Comercio de España veñen de confirmar ao Concello de Ribeira a vindeira concesión dunha axuda destinada á modernización comercial do tecido produtivo local, logo da consideración como “proxecto singular” da iniciativa Ribeira, un mar de comercio, elaborada pola Concellería de Innovación Tecnolóxica en colaboración coa Concellería de Turismo e Comercio. Este proxecto vén con dúas liñas estratéxicas: unha enfocada na comercialización e mellora da competitividade e a outra na promoción e difusión do consumo local. O Concello recibirá un total de 54.360 euros.
A primeira das liñas incluirá entre outros conceptos a posta en marcha dunha imaxe corporativa para os negocios adheridos á plataforma de comercio electrónico Ribeira Store, materializada a finais de agosto no marco do Plan Reactiva Ribeira co fin de axudar a “sobrelevar os efectos da pandemia entre o tecido económico do municipio”. Tamén está previsto proporcionar formación aos comerciantes adheridos.
Tokapp
A segunda liña prevé o desenvolvemento dun sistema de mensaxería baseado en Tokapp, unha aplicación móbil que está emprazada xa en máis de 4.000 institucións con máis de 3 millóns de usuarios, e que permitirá ao Concello emitir mensaxes de interese público para todo o comercio e manter informado ao sector de todas as actualizacións e informacións relevantes.
Así mesmo, posibilitará o lanzamento dunha campaña de dinamización e promoción que integre a posta en valor do comercio local cos recursos turísticos da marca Ribeira e, por outra parte, un plan de mercadotecnia dixital (xa en marcha) orientado a mellorar a visualización de Ribeira Store no ecosistema dixital.
Para facer efectivo o outorgamento desta axuda, o Concello procederá nos próximos días a subscribir co Ministerio e a Cámara de Comercio un convenio de participación da actuación de modernización comercial no comercio ao por menor.
A concesión desta axuda foi outorgada logo de participar o Concello de Ribeira dunha convocatoria pública destinada a co-financiar a realización de proxectos singulares orientados á modernización comercial conforme ao anuncio publicado no BOE o pasado 3 de setembro de 2020.