Os operarios de Protección Civil de Porto do Son proseguen co seu labor incansábel para pór freo á presenza de COVID no termo municipal, facendo fincapé nas zonas máis concorridas ou vulnerábeis. Segundo informou o Goberno local, estes días os traballos de desinfección puxeron o foco nas áreas urbanas próximas aos centros de saúde, farmacias, prazas, rúas de máxima afluencia, a ludoteca e máis o propio Consistorio.
O Concello tamén explicou que debido aos avisos meteorolóxicos, os traballos previstos para a madrugada deste 22 de xaneiro tiveron que adiarse co fin de permitir que o grupo local de Protección Civil se centrase nas incidencias derivadas do temporal.
