O conxunto noiés xogará por segunda vez consecutiva como visitante na Segunda División. Tras volver cun empate contra a UA Ceutí, o cadro de Marlon Velasco tentará volver á senda do triunfo contra o Soliss FS Talavera, un dos mellores equipos da categoría, pero que actualmente non pasa pola súa mellor racha.
O encontro correspondente á oitava xornada da Segunda División subgrupo B terá lugar no Primero de Mayo, un pavillón no que nunca conseguiu gañar o equipo galego. Desta volta, o Noia FS tentará romper esa maldición e afondar na ferida do Talavera, que só conta cun triunfo no que vai de competición.
Logo de deixar escapar os tres puntos no tramo final da xornada anterior, o Portus Apostoli buscará volver á boa dinámica de vitorias do comezo de liga. O encontro terá lugar no pavillón Primero de Mayo, a partir das 18:00 horas e acollerá a un total de 300 persoas. Ademais, será emitido en directo a través de CMM Play, con previo rexistro.