A conselleira do Mar, Marta Villaverde, defendeu este martes a importancia de crear as condicións necesarias para que as novas xeracións vexan no sector marítimo-pesqueiro unha oportunidade de crear as condicións de futuro que lles permita desenvolver un proxecto de vida digno, seguro e estábel.
Foi durante o acto inaugural da clausura do proxecto “Relevo xeracional: o futuro do mar” celebrado na Cidade da Cultura de Galicia, onde incidiu na necesidade de que a mocidade escolla as profesións marítimas “por orgullo e por vocación e non por descarte”.
A remuda xeracional, dixo a conselleira, constitúe un desafío demográfico , económico e cultural directamente relacionado coa sustentabilidade da pesca e as comunidades costeiras. Neste senso, explicou a conselleira, afrontar este reto require unha estratexia integral na que participen as administracións públicas, as entidades do sector e os centros educativos, co obxectivo de facilitar a incorporación de novos profesionais e dar resposta ás necesidades presentes e futuras da actividade pesqueira.
Referíuse tamén Marta Villaverde á importancia de trasladar á mocidade a realidade dun sector que incorpora novas tecnoloxías, innovación e oportunidades de emprendemento. Nesta liña, a conselleira salientou o papel da formación e o contacto directo coa actividade profesional para achegar as novas xeracións ao mar a través de iniciativas como as desenvolvidas neste proxecto, que jncluiron visitas a instalacións pesqueiras, experiencias de embarques e encontros en centros formativos.
Agradeceu Marta Villaverde a implicación dos oito Grupos de Acción Local do Sector Pesqueiro (GALP) Ría de Arousa, así como a colaboración do GALP do País Basco. Referíuse á colaboración interterritorial que comparte desafíos semellantes e do intercambio de experiencias e boas prácticas para abordar a remuda xeracional, recoñecendo a participación das confrarías, organizacións profesionais e centros educativos nas actividades desenvolvidas.
As conclusións desta iniciativa permitirán coñecer de primeira man as experiencias e necesidades trasladadas polos participantes, información que a Consellería do Mar terá en conta no deseño das súas políticas. Neste contexto fixo referencia á necesidade de avanzar nun sector máis atractivo, seguro e competitivo no que, mulleres e hiomes, mozas e mozos, poidan desenvolver a súa traxectoria profesional en igualdade de oportunidades.
