O próximo sábado 14 de novembro temos en Noia, grazas ás súas II Xornadas Micolóxicas, unha cita coa natureza, os cogomelos e a gastronomía. Será, en palabras da organización, “unha xornada para aprender, descubrir e gozar da riqueza micolóxica da nosa contorna”.
O programa dará comezo ás 10.00 horas cunha charla teórica no Edificio do Casino co biólogo Xosé Lois Piñeiro, para coñecer mellor o fascinante mundo dos cogomelos. Ás 11.00 horas celebrarase unha saída ao monte (un percorrido pola contorna de Noia para descubrir e aprender a identificar diferentes especies).
Ás 13.15 celebrarase unha demostración gastronómica na Casa da Agra, na praza do Tapal e co cociñeiro Marcos Arufe, que amosará ás persoas participantes na xornada as posibilidades gastronómicas dos cogomelos.
As prazas serán limitadas. As inscricións están abertas e pódese formalizar no formulario en liña habilitado.
