O Concello de Ribeira lanzará dende este fin de semana a campaña de captación de veciños Dale Vida ao teu Lixo para a implantación de composteiros no termo municipal, que lles proporcionará aos usuarios a formación e o manexo necesario do recipiente a través dunhas semanas presenciais.
Esta iniciativa consistirá en instalar dous centros de compostaxe comunitario, co fin de tratar o tema dos biorresiduos no casco urbano da localidade. Haberá 2 zonas de compostaxe, localizadas nas inmediacións do barrio de Abesadas e Fontán. O obxectivo é recibir os residuos orgánicos procedentes dos domicilios nun perímetro de 500 metros. Ademais, utilizaranse restos de rozas, podas, céspedes de xardíns e hortas como material estruturante, e incluirase a distribución 85 composteiros domésticos por distintos puntos da cidade. Desta forma, os veciños e participantes terán os materiais necesarios para elaborar un compost a partir da fracción orgánica xerada dos seus domicilios.
O proxecto, levado a cabo pola Consellería de Medio Ambiente, Territorio e Vivenda, ten un presuposto de 59.998,60 euros e está co-financiado polo Fondo Europeo de Desenvolvemento Rexional e o programa operativo FEDER Galicia 2014 – 2020.
As persoas que queiran participar e precisen recibir máis información poderán inscribirse a través do 981 972 530 ou a través do seguinte email: compostaxe@ribeira.gal.