A rapazada de Rianxo poderá falar cos Reis Magos este Nadal

A Asociación de Empresarios de Rianxo (ARE), informou de que iniciou contactos cun grupo de paxes reais para que as nenas nenos de Rianxo poidan falar este Nadal dende as súas casas cos Reis Magos.

Co fin de que as Súas Maxestades poidan falar con cada neno/a, un titor/a legal das crianzas deberá rexistrarse e reservar unha data na web www.nadal2020.es. Así, o día e hora reservado nesta páxina os Reis Magos poranse en contacto co cativo/a por vídeo-chamada.

O prazo de inscrición e reserva de datas comezou esta semana e remata o día 29 de decembro. Esta iniciativa da Asociación de Empresarios de Rianxo lévase a cabo para que, en palabras da entidade, “neste Nadal tan atípico no que todos temos que actuar con responsabilidade e máxima precaución e no que non haberá as tradicionais cabalgatas de reis, ningún neno perda a ilusión destas datas tan especiais”.