A Biblioteca Nós recuperará Diario 1921 de Castelao

Ourense acolleu este luns 28 a presentación da Biblioteca Nós, impulsada polo Goberno galego (Consellería de Cultura) e a Editorial Galaxia. A estrea da colección inclúe o relanzamento de dez publicacións dos autores máis representativos da Xeración Nós, entre os que se atopa o rianxeiro Alfonso Daniel Rodríguez Castealo (do que se vai recuperar Diario 1921). A iniciativa enmárcase nas accións programadas con motivo da xeración da revista do mesmo nome, da que forma parte, tamén, a exposición Galicia, de Nós a nós, que xa foi visitada no Gaiás por máis de 10.00 persoas e que vai estar en Ourense, no Centro Cultural Marcos Valcárcel, a partir do 18 de febreiro.

Na presentación participaron o conselleiro de Cultura, Educación e Universidade, Román Rodríguez; o presidente da Deputación de Ourense, Manuel Baltar, e o presidente da Editorial Galaxia, Antón Vidal.

No acto, o titular de Cultura da Xunta salientou o peso da cidade de Ourense na actividade e creación cultural: “Falar de Ourense é facelo dunha referencia cultural, artística e literaria, dunha cidade que acolleu a numerosos escritores e poetas e que veu nacer a un dos movementos máis importantes dos últimos séculos: a Xeración Nós”, afirmou.

A colección presentada recolle dez obras dos autores máis representantes e senlleiros deste colectivo que revolucionou a Galicia do seu tempo “ensanchando as nosas fronteiras culturais e alumeando a conciencia colectiva da nosa terra”. Os títulos reeditados en colaboración coa Editorial Galaxia son: O esquecedor mentor de Nós, de Antonio Losada Diéguez; Teoría do nacionalismo galego e Leira, de Vicente Risco; Polos vindeiros da saudade, Entre a vendimia e a castañeira e O Señorito da Reboraina, de Ramón Otero Pedrayo; Vicente Risco, de Carlos Casares; Co pensamento na patria, de Antón Vilar Ponte; Antífona da Cantiga, de Ramón Cabanillas, e Diario 1921, de Castelao.

Segundo lembrou Rodríguez, a programación deseñada para conmemorar o centenario de Nós alongarase ata 2021 e está composta por publicacións, homenaxes, recoñecementos e exposicións entre as que se atopa a creación dunha páxina web que aglutina todos os contidos da dita xeración galeguista ou a exposición Galicia, de Nós a nós, a gran mostra que xa foi visitada na Cidade da Cultura por máis de 10.000 persoas de xeito presencial e que chegará á cidade de Ourense o vindeiro 18 de febreiro. Así, tal e como explicou o conselleiro, as máis de 300 pezas que compoñen esta mostra e que proceden de España, Francia, Alemaña e Portugal estarán expostas no Centro Cultural Marcos Valcárcel ata abril de 2021.