O Concello de Porto do Son vai organizar, a partir do 7 de outubro un obradoiro de actividades para estimular a memoria dirixido a persoas maiores de 55 anos. Farao en diversas localizacións do concello, da man da Concellería de Benestar Social.
As actividades celebraranse na propia vila de Porto do Son, os mércores en dúas quendas (de 10.00 a 11.00 horas e de 11.00 a 12.00 horas) e os venres na Casa da Cultura de San Pedro de Muro (ás 9.30 horas), na Casa da Cultura de Xuño (ás 10.30 horas) e na Casa da Cultura de Caamaño (ás 11.30 horas).
As sesións, que terán prazas limitadas para garantir a seguridade sanitaria das e dos asistentes, ofrecen a posibilidade de realizarse no propio domicilio das persoas interesadas, con seguimento das actividades. Os devanditos horarios e emprazamentos para as actividades están suxeitos a variacións en función da demanda existente. Para facer as inscricións ou obter máis información cómpre chamar ao teléfono 981 86 74 14.
