Boiro encara a recta final de setembro con música, actividades de cultura urbana e, sobre todo, contacontos para os máis pequenos da casa. A axenda do Concello volve despegar, despois dun verán cultural ateigado de citas lúdicas e culturais, co espectáculo Chocolate, un contacontos de Teatro Calavera que contará coa presenza do cociñeiro Antón e a pasteleira Tomasa. A actividade, prevista para o Centro Social de Escarabote a partir das 20.00 horas, incluirá un obradoiro de cociña. Segundo informa o Concello, as entradas serán limitadas e a reserva de prazas pode facerse a través do enderezo reservacultura@boiro.gal antes do xoves as 13.00 horas.
Ao día seguinte, o salón de actos da Casa da Cultura de Boiro acollerá a partir das 20.00 horas outra nova sesión para os máis pequenos: o contacontos Rilla-Rilla, a cargo de Xarope Tulú. Trátase dun espectáculo para público infantil e familiar a partir dos seis anos. Novamente haberá aforamento limitado (as prazas poden solicitarse en reservacultura@boiro.gal).
A axenda cultural inclúe unha nova actividade do Festival de Arte Urbana de Boiro, o sábado 26 a partir das 11.00 horas con quedada na rúa peonil, á altura do bar Tecate. Trátase dunha experiencia Escape Room, que, para quen non o saiba, consiste nun xogo de probas de escapismo para ser resolvidos polos participantes na experiencia nun límite marcado de tempo. As prazas son limitadas e as reservas no enderezo electrónico educacion@boiro.gal.
Na mesma xornada, ás 17.00 horas na contorna exterior do Centro Social de Cabo de Cruz, representarase o espectáculo Os Contos de Pablísimo, un conxunto de relatos orais dirixido ao público infantil de idades comprendidas entre os 4 e o 9 anos. A cita, que no caso de choiva celebrarase no interior do Centro Social, tamén virá con aforamento limitado (as prazas poden reservarse en reservacultura@boiro.gal).
O mesmo día 26 de setembro o eixe cultural trasládase pola noite á praza do Centro Social de Cures, onde haberá unha Noite de Verbena amenizada pola Orquesta Puzzle. Será a partir das 20.00 horas. As prazas serán limitadas. Poden solicitarse as entradas na Casa da Cultura de Boiro ou no telefono 981 84 84 25.